LO CIVÈT DE LAPIN

Chau : 1 lapin, 3/4de l. de vin roge, 1 pastenalha, 2 cebas, 2 venas d’alhet, 2 fuèlhas de laurièr, 2 branchilhas de frigoleta, 100 gramas de lardons magres, 4 cuilhèraas a sopa d’òli d’oliva, 1 nose de burre maneiat, sau e pebre, 600 gr de tartiflons ratas, 4 pèças de pan mollet descrostaas e copaas en pichòts cubes

. Recatar lo sang dau lapin, i ajotar una rasada de vinagre per que calhèsse pas.
. Copar lo lapin en seguent las articulacions, fau pas prene lo chaplador per pas far d’ossilhons.
. Botar los morsèls de lapin, levat lo fetge, dins una marmita pron bèla, daube las cebas, l’alhet e la pastenalha menusats, lo laurier, la frigoleta. Salar, pebrar, banhar daube lo vin e laissar marinar una nuèit.
. Dins una coquèla de fonta esmalhaa, botar l’òli, far daurar los lardons, puèi los morsèls de lapin esgotats, las cebas, l’alhet, los tròcilhons de pastenalha, lo laurièr e la frigoleta de la marinada. Quand tot aquò es daurat, banhar daube lo vin de la marinada.
. Cubrir e laissar mitonar plan planet una ora e mieja en borlant de temps en temps. Se de besonh, botar un pauc d’aiga.
. 5 minutas davant de servir, ajotar lo fetge pilat daube lo sang e un pauc de persil. Ajotar tanben, lo burre maneiat, mesclar delicatament, laissar bolhir un momenton.
. Verifiar l’assasonament, garar lo laurièr e la frigoleta.
. Servir daube los crostets fricassats e los tartiflons, cuèits a la vapor e despelats.

Totas las recèptas de lapin

Totas las recèptas de setembre

Français

LO PASTAT DE LAPIN

Chau : 1 lapinàs, 300 gramas de vèl, 250 gramas de lard magre fresc, 1 tassa de moleta de pan trempaa dins de lait, 2 uòus, 1 culhier a cafè de frigoleta sechaa e ben esquichaa, 2 branchilhas de frigoleta, 2 fuèlhas de laurièr, 1 veire a liquor d’aigardent o d’Armanhac, bardas de lard gras, sau (16 gramas per quilò de vianda), pebre

• Desossar lo lapin, chaplar la charn, lo fetge, lo còr, los ronhons, la vianda de vèl e lo lard magre.
• Dins un saladièr pron bèl, mesclar lo chapladís de vianda daube la moleta de pan trempaa dins de lait e eissauraa, los uòus batuts, la frigoleta esquichaa, l’aigardent (o l’Armanhac), sau e pebre.
• Travalhar ben tot ensems, d’abord daube una forcheta, puèi daube las mans.
• Tapissar una terrina de bardas de lard gras, emplir daube la preparacion. Pausar puèi las doas branchilhas de frigoleta e las doas fuèlhas de laurièr, achabar per una barda de lard gras.
• Cubercelar la terrina, far cuèire au banh mariá. Enfornar a 220°, quand l’aiqa bolh redurre a 180° (2 oras).
• Laissar refresir dins la terrina. De preparar 48 oras davant de minjar. Per servir, copar en tranchas, acompanhar d’olivas negras e de cornissons

Totas las recèptas de lapin

Totas las recèptas de novembre

Français

LO LAPIN A LAS CHANTARÈLAS

Chau : 1 lapin despolhat e descopat (reservar lo fetge per far un gatèu), 5 culhieraas a sopa d’òli d’oliva, 4 escalonhas, 1 vena d’alhet, 2 branchilhas de frigoleta, 2 pichòts veires a mostarda de vin blanc sec, 100 gramas de crèma, 1 liura de chantarèlas, o mai si avètz fait una bona culheta !, sau e pebre

• Dins una coquèla de fonta esmalhaa, far chaufar l’òli e far revenir los morsèls de lapin.
• Ajotar la frigoleta, las escalonhas e l’alhet chaplats.
• Salar, pebrar, banhar daube lo vin blanc.
• Cubercelar e laissar mitonar 30 minutas.

Entretemps :
• Triar e lavar las chantarèlas, las botar dins una casseiròla, salar pas gaire, cubrir, botar sus lo fuòc fins que las chantarèlas rendan tota lor aiga.
• Esgotar.
• Ajotar dins la coquèla daube lo lapin, laissar cuèire encara 20 minutas.
• Tirar los morsèls de lapin e las chantarèlas dins lo plat de servici, gardar au chaud.
• Ajotar la crèma dins la sauça, verifiar l’assasonament sau e pebre, laissar demenir un momenton, versar sus lo lapin e las chantarèlas. Servir acompanhat de pastas.

Totas las recèptas de lapin

Totas las recèptas d’Octòbre

Français

LAPINON A LA PADÈLA

Chau : 1 lapinon despolhat e descopat, 4 culhieraas a sopa d’òli d’oliva, 4 venas d’alhet, 1 gròssa punhaa de persil, sau, pebre, vinagre de vin

. Dins una padèla, far chaufar l’òli, far daurar los morsèls de lapinon, salar, pebrar, cubrir, redurre lo fuòc e laissar cuèire peraquí 45 minutas en borlant sovent. Se de besonh, botar quauquas gotas d’aiga. Lo lapinon deu pas cramar mas deu èstre franc rostit.
. 5 minutas davant la fin de la cuèisson, saupodrar daube l’alhet e lo persil chaplats. Mesclar ben.
. Botar los morsèls de lapinon dins lo plat de servici, desglaçar la padèla daube una bona rasada de vinagre de vin, versar sur lo lapinon e servir sul pic

Totas las recèptas de lapin

Totas las recèptas de julhet

Français