CACALAUS A L’AIGRETA

Chau : 4 dotzenas de gròs cacalaus o mai se son de cacalausons, 100 gramas d’aigreta, 1 punhaa de persil, 2 venas d’alhet, 1 pastenalha, 100 gramas de jambon cru, 8 fialats d’anchòias a l’òli d’oliva, 4 culhieraas a sopa d’oli d’oliva, 1 culhieraa a sopa de farina, 1 bòle de bolhon lèu fach, 6 culhieraas a sopa de crèma frescha, sau e pebre, 4 crostas en pasta fulhetaa (per bochaas a la reina)

• Chaplar ensems l’aigreta, lo persil, l’alhet, la pastenalha, lo jambon, los fialats d’anchòias.
• Dins una coquèla botar l’òli d’oliva, i far revenir lo chapladís en borlant ben. Saupodrar de farina, banhar daube lo bolhon, salar pas gaire, pebrar, ajotar los cacalaus, laissar gargatar 30 minutas. Ajotar la crèma frescha.
• Laissar refresir un momenton, botar puèi, dins las crostas. Passar 12 minutas au forn (170°) e servir

Totas las recèptas de cacalaus

Totas las recèptas de mai

Français

CACALAUS EN CAUQUILHAS

Chau : 4 dotzenas de gròs cacalaus e lors cauquilhas preparats, 2 tranchas de jambon crus, 8 fialats d’anchòia a l’òli d’oliva, 100 gramas de burre, 1 gròssa punhaa de persil, 4 venas d’alhet, sau e pebre

Preparacion: lavar sonhosament los cacalaus dins plusors aigas. Los botar dins una ola, los cubrir d’aiga adicionaa de sau e de vinagre. Ajotar una ceba picaa de 4 clavels de giròfle, 4 fuèlhas de laurièr, 2 branchilhas de frigoleta. Far bolhir. Laissar cuèire 45 minutas. Esgotar. Descauquilhar daube una agulha. Fau pas garar lo virolet negre qu’aquò es lo fetge. Lavar las cauquilhas, far sechar dins lo forn (deu pas ges restar d’aiga dins lo fons de la cauquilha). • Aprestar lo burre de cacalaus » : chapotar lo jambon, los fialats d’anchòia, lo persil e l’alhet. Mesclar daube lo burre. Salar e pebrar. • Botar un pauc de « burre de cacalaus » dins lo fons de la cauquilha, botar lo cacalaus e bochar daube de « burre de cacalaus ». • Passar detz minutas au forn ben chaud e servir.

Se avètz acampat fòrça cacalausons povetz los fricassar a la padèla daube lo « burre de cacalaus » sens tornar encauquilhar e vos ofrir una bona ventraa. Perqué pas « un cent » en plaça d’una dotzena ! E se avètz pas gaire de cacalausons, povetz ne’n far una omeleta !

Totas las recèptas de cacalaus

Totas las recèptas de tot l’an

Français