LAS CALHETAS

Chau : 500 gramas de tèsta de caion cuèita e desossaa, 800 gramas de charn magra, 600 gramas de  » gorgeron « , 300 gramas de fetge, 2,5 quilòs d’èrbas (fuèlhas de blètas, escarola, frisaa, laitissons, risòlas (davant florason) ; es ben de botar au mens doas menas d’èrbas), un bèl morsèl de coèifa, sau (40 gramas), pebre

• Triar, lavar las èrbas. Plonjar dins d’aiga bolhenta, comptar 10 minutas de cuèisson dau moment que l’aiga torna bolhir.
• Esgotar, rinçar a l’aiga frescha. Pressar daube las mans per eissaurar. Au besonh, sarrar e esquichar dins un torchon. Deu ges restar d’aiga.
• Botar la coèifa a trempar dins d’aiga chaudeta.
• Chaplar vianda e èrbas daube lo chaplador (grilha moiena).
• Ajotar sau e pebre.
• Travalhar daube las mans.
• Totjorn daube las mans far de bolas dau mescladís de davant, ensarrar dins un morsèl de coèifa, plaçar dins un plat anant au forn.
• Enfornar a 180°, peraquí 1 ora 20.
• Tirar dau forn, arrosar d’una bona rasada de vin roge, tornar enfornar 5 minutas. Servir chaud. Acompanhar de tartifles a la vapor o d’una purèia de tartifles

Las calhetas pòvan se minjar soletas, chaudas o fredas. Son de bon congelar. Sufis, quand son descongelaas, de las passar 10 minutas au forn (180°)

Totas las recèptas de caion

Totas las recèptas de març

Français

LA FRICASSÈIA

Chau : 8 morsèls de bodin negre (peraqui 600 gramas), 80 gramas de fetge de caion, 80 gramas de paumon de caion, 80 gramas de ronhon de caion, 80 gramas de còr de caion, 80 gramas de ratèla, 80 gramas de sain de caion, sau

• Copar en marsèlons : saïn, fetge, paumon, ronhon, ratèla e còr.
• Dins una granda padèla, far fondre lo saïn, ajotar los morselons de fetge, de paumon, de ronhon, de ratèla e de còr, far revenir sus fuòc moien, peraquí 20 minutas, en borlant sovent. Salar.
• Garar la pèu dau bodin, botar dins la padèla daube las viandas, far daurar d’un costat puèi de l’autre, arrosar los morsèls de bodin daube una culhieraa a sopa d’aiga, cubrir la padèla 5 minutas de temps, lo bodin deu gonflar. Servir sul pic, acompagnat d’una salada de Chalendas, o tot simplament de mostarda a l’ancièna

Totas las recèptas de caion

Totas las recèptas de març

Français

AUCÈLS SENS TÈSTAS

Chau : 4 tranchas finas de fetge de caion, 4 tartifles  » Bintje  » (pas tròp gròs), 4 fuèlhas de bletas, 4 bardas de lard magre salat, 4 escalonhas, 3 culhieraas a sopa d’òli d’olive, sau e pebre

• Plomar e lavar los tartifles.
• Lavar las fuèlhas de bletas.
• Sus una plancha, dispausar las bardas de lard, botar dessús dins l’òrdre : las fuèlhas de bletas, las tranchas de fetge, salar, pebrar, achabar per los tartifles. Rotlar, ficelar.
• Dins la còcòta minuta, far chaufar l’òli, botar los « aucels », far revenir de totes los costats, ajotar las escalonhas menusaas, quand son dauraas, banhar daube 1/2 tassa d’aiga, sarrar la còcòta, laissar cuèire 15 minutas. Desficelar, servir daube lo jus e de mostarda a l’ancièna

Totas las recèptas de caion

Totas las recèptas de tot l’an

Français

PASTAT DE FETGE

Chau : 750 gramas de charn magra, 500 gramas de peitrina frescha descoèinaa, 350 gramas de fetge, 2 uòus, 1 escalonha, 1 vena d’alhet, 1 culhier a cafè de frigoleta sechaa e ben esquichaa, 1 pichòt veire a mostarda de vin blanc sec, 1 pichòt veire a liquor d’aiga de flors d’irangièr o d’Armanhac, 30 gramas de sau, 3 gramas de pebre, 4 bardas de lard gras fresc

• Chaplar las viandas, l’escalonha e l’alhet daube lo chaplador.
• Ajotar los uòus, lo vin blanc, l’aiga de flors d’irangier o l’Armanhac, la frigoleta, sau e pebre, mesclar ben, travalhar daube las mans.
• Botar 2 bardas de lard dins lo fons d’una terrina, tassar la preparacion, pausar las 2 bardas de lard que rèstan, cubercelar la terrina.
• Far cuèire au banh maria dins lo forn durant 2 oras. Enfornar a 220°, quand l’aiga bolh redurre a 180°
• Preparar 48 oras davant de lo minjar. Servir fred, copat en tranchas o dreit dins la terrina. Acompanhar d’olivas negras e de cornissons

Per conservar aquel pastat : laissar refresir, recubrir puèi daube de saïn fondut encara chaudet. Se pòt gardar 1 o 2 mes au refregidor. Aquel pastat es de bon congelar. Sortir dau gelador 4 à 5 oras davant de lo minjar

Totas las recèptas de caion

Totas las recèptas de tot l’an

Français