TOMA EN SALADA

Per 4 convivas chau : 500 gramas de toma frescha ben esgotaa, 5 culhieraas a sopa d’òli d’oliva, de nose o de chaul, 4 culhieraas a sopa de vinagre de vin, 4 venas d’alhet, 1 punhaa de ciboleta, sau e pebre.

• Escrasar la toma daube una forcheta.
• Apondre l’òli, lo vinagre, la sau, lo pebre, l’alhet e la ciboleta menusats.
• Mesclar.
. Servir daube de tartifles ronds cuèits a la vapor.

Agreiabla l’estiu, la toma en salada se minjava tanben per lo gostornar daube de pan. Aquesta recèpta, se pòt far tanben daube de toma de vacha. Se pòt servir a l’aperitiu sus de finas pecetas de pan de seia o de pan de chastanhas.

Totas las recèptas de fromatge

Totas las recèptas de tot l’an

Français

LA PÒTAA AU CHAUL

Chau : 1 chaul cabús verd, 600 gramas de paleta de caion salaa, 1 saucissa a bolhir, 250 gramas de lard magre salat, 4 pastenalhas, 4 ravas o navets, 8 tarlifles, 1 gròssa ceba, 2 clavèls de giròfle, 1 branchilha de frigoleta, 1 fuèlha de laurièr, 2 pichòts veires a mostarda de vin blanc, 1 pichòt veire a mostarda d’aiga.

La velha:
• Far dessalar la paleta e lo lard dins plusors litres d’aiga.
• Botar la saucissa dins d’aiga freda, far chaufar e laissar fremir 10 minutas.

Lo jorn mème :
• Triar, lavar e quartejar lo chaul, lo far blanchir dins d’aiga bolhenta pendent detz minutas.
• Esgotar, rinçar a l’aiga freda.
• Botar puèi dins l’òrdre dins la còcòta minuta:
• la ceba picaa daus clavels de giròfle, la frigoleta, lo laurier.
• los quartièrs de chaul.
• la paleta, la saucissa, lo lard.
• las pastenalhas, las ravas.
• banhar daube lo vin blanc e l’aiga.
• Sarrar la còcòta e far cuèire plan planet 1 ora. Quinze minutas davant la fin, dubrir la còcòta e ajotar los tartifles.
• Servir tot ensems daube de cornissons e de mostarda a l’ancièna.

Totas las recèptas de legumes

Totas las recèptas de janvièr

Français

LO CHAUL FARCIT

Chau : 1 chaul verd ben pomat. Per lo farcit chau : 600 gramas de chapladís de vianda per mitat caion (charn per las saucissas) e vèl, 1 tassa de moleta de pan trempaa dins de lait, 1 culhieraa a sopa de persil chaplat. Per la cuèisson chau : una granda coèifa, una coèina de lard, 6 pastenalhas, 1 ceba, 2 fuèlhas de laurièr, 1 branchilha de frigoleta, 200 gramas de lard magre copat en tròcilhons, 2 pichòts veires a mostarda de bolhon de buòu (1 tableta), 2 pichòts veires a mostarda de vin blanc, 5 culhieraas a sopa d’òli d’oliva, una vintena de chastanhas cuèitas a l’aiga (10 minutas) e despelaas, sau e pebre

• Garar las promièras fuèlhas dau chaul. Daube un cotèl ponchut retirar una bona partiá dau tronhon. Lavar. Far blanchir detz minutas dins d’aiga bolhenta salaa.
• Rafreschir. Laissar esgotar dins una passoèra.
• Aprestar lo farcit: Mesclar lo chapladís de vianda daube la moleta de pan e lo persil. Salar pas gaire e pebrar.
• Far trempar la coèifa dins d’aiga chaudeta per la far amolir, l’estalar sus un torchon, pausar lo chaul au mitan.
• Escartar las fuèlhas dau chaul, quand son tròp petitas e sarraas per las rabatre, prendre un cotèl ponchut per garar lo còr e botar una bola de farcit en plaça. Redreiçar puèi, las fuèlhas a chaa una en forrant de farcit. Ben sarrar las fuèlhas per tornar formar lo chaul. L’escondre franc dins la coèifa. Ficelar sens tròp sarrar.
• Dins una coquèla en fonta esmalhaa botar l’òli, la coèina, la ceba menusaa, los tròcilhons de lard, las pastenalhas copaas en rondèlas, lo laurièr, la frigoleta. Far revenir leugierament tot aquò, ajotar puèi, lo chaul e banhar daube lo vin blanc e lo bolhon. Cubercelar e laissar gargatar doas oras.
• 1\4 d’ora davant la fin de la cuèisson, ajotar las chastanhas cuèitas (10 minutas dins d’aiga leugierament salaa) e despelaas (las doas pèus). Per servir botar lo chaul au mitan dau plat de servici, desficelar, copar, dispausar las pastenalhas, los lardons e las chastanhas a l’entorn.

Se pòt passar de coèifa, mas es mai defecile per ficelar. Per cuèisson dins la còcòta minuta, redurre de mitat lo vin, lo bolhon e lo temps de cuèisson

Totas las recèptas de legumes

Totas las recèptas de tot l’an

Français

PERDRITZ AU CHAUL

Chau : 1 perdritz, 1 chaul cabus verd, 200 gramas de lardons magres salats, 1 gròssa ceba, 2 pastenalhas, 2 culhieraas a sopa d’òli d’oliva, 1 vena d’alhet, 1 branchilha de frigoleta, 1/4 de l. de bolhon lèu fach, sau e pebre.

• Plumar, busclar, lavar la perdritz. Botar en dedins, lo fetge, lo còr, lo gigièr, l’alhet e la frigoleta.
• Triar, lavar, tronçonar lo chaul.
• Far blanchir dins d’aiga bolhenta pendent 10 minutas.
• Esgotar, rinçar a l’aiga freda.
• Far bolhir d’aiga dins la còcòta minuta, salar, botar lo chaul, sarrar la còcòta e laissar cuèire 7 minutas.
• Esgotar, rinçar a l’aiga freda, chaplar grossièrament daube un cotèl dreit la passoèra.
• Dins una coquèla de fonta esmalhaa, far chaufar l’òli, far revenir la perdritz sus totes los costats, ajotar puèi, los lardons, la ceba e las pastenalhas menusaas. Salar, pebrar, banhar daube un pauc de bolhon lèu fach. Cubercelar, laissar mitonar 45 minutas.
• Tirar la perdritz, botar lo chaul en la plaça, ben mesclar daube lo jus e los lardons, pausar la perdritz sus lo chaul, arrosar daube lo bolhon que rèsta, tornar cubercelar e laissar mitonar encara 30 minutas.

Òm pòt aprestar dau meme biais, un faisan o, fòra la sason de chaça, una pintarda

Totas las recèptas de polalha

Totas las recèptas d’octòbre

Français