LO GRAS DOBLELAS BOLETAS

LO BOLHIT

De 4 a 8 convivas : 3 liuras de plat de costes, 750 gramas de jarret de buòu sens òs, 1 òs a miolon, 1 ceba picaa de 4 clavèls de giròfle, 2 fuèlhas de laurièr, 2 branchilhas de frigoleta, 1 brancha d’api, 4 pòrres, 8 pastenalhas, 8 pichòtas ravas, 8 tartifles  » Bintje « , sau e pebre

. Dins una ola pron bèla, botar 3 litres d’aiga, la ceba, lo laurièr, la frigoleta, l’api, sau e pebre, far prene lo bolh.
. Plonjar la vianda dins l’aiga bolhenta, laissar cuèire 1 ora e mieja.
. Ajotar puèi l’òs a miolon, pòrres, pastenalhas, ravas, laissar cuèire encara 1 ora. . Ajotar los tartifles, laissar cuèire encara una mieja ora.
. Servir un pauc de bolhon daube de crostets e de gruèra raspat. En sason, los crostets se pòvan remplaçar per de chastanhas bolhiás.
. Copar una peceta de pan per conviva, tartinar daube lo miolon, salar. Minjar sul pic (lo miolon calha lèu lèu). Fin finala, descapar la vianda e servir daube: los legumes, una sauça verda, de cornissons e de mostarda a l’ancièna

Lo bolhit se minjava surtot lo dimenche, de fes per la Totsants, quand la parantèla de la vila veniá per florir la tomba daus anciens. Èra tanben l’ocasion de tastar las promièras chastanhas daube lo bolhon. E, a la fin dau repas, quand la patrona adusiá lo cafè e l’aigardent, los convivas assadolats e joiòs lançavan « Radusètz lo bolhit! « . Èra un biais de li dire qu’avián ben minjat, que s’èran regalats, que ne’n povián plus ! Lo bolhit èra talament tradicional per los repas de familha, que se disiá « Radusètz lo bolhit » tanben quand s’èra minjat un rostit o un civèt ! Las rèstas de bolhit son de bon rechaufar, se pòvan tanben minjar fredas daube de mostarda e de cornissons, en salada daube de tomatas e de tartifles o pòvan servir per farcir de legumes e surtot per far de boletas !

Totas las recèptas de buòu

Totas las recèptas de novembre

Français